L'é 'na tipica marmelata dura, taiàda a tòc gròssi e quadrati, fata co i pomi codògni, ossia quei che se li pol magnàr sol che da còti. Tante case de Codogné le èra sempre fornide de 'sti pomi: Codognè se ciama cussì par questo! La codognàda la vegnéa fata aposta pa 'l merendìn dei tosatèi. Ma anca sta tradizhion l'é sparida! Cusinar sul vapor, o senò in tanta acqua, 'na cèrta quantità de pomi codògni e quando che i sarà ben tèneri taiàrli e cavàrghe ‘l torsol duro. Bada che i pomi codògni i va sempre cusinadi co la so scorzha, parché la so parte pì gelatinosa l'é proprio scondèsta dentro sta scòrzha. Meter sul fògo sto purè de pomi e farghe consumar la polpa, sempre missiando, fin tanto che la sarà deventada de un bel color rubìn scuro e che la so acqua la se sarà svampìda tuta quanta (ghe vorà quasi un'ora a fògo bas). Alora pasàr sto purè par un tamìso de crine (bisogna pròpio che sto tamìso al sìe de crine parché se 'l fusse de fèro i pomi i deventarìa neri). Poi dontàrghe una proporzhion de 300 grami de zhuchero par ogni chilo de polpa. L'é anca chi che ghe méte, sempre par chilo de polpa, al sugo de un limon. Cusinàr ancora fin tanto ch'el compòsto se destaca da i orli de la técia. Revesàr el composto in te un stamp retangolar, vardando ch'el strato el sia àlt almanco do déi. Dopo, quando che la marmelata la se sarà indurida (ghe vorà dualche dì) e la varà ben ciapà la forma de ‘l stamp, taiàrla a quadrati o a striche e méter sti tòc a secarse al sol, fin tanto che par sora no se sarà formà 'na legera crostesina. Alora cuèrder ogni tòc co 'na spolverada de zhuchero, de quel bèl gròs, e conservàr sta codognada in scatole de lata, co dentro, volendo, qualche fòia de lauro par darghe profumo. GELATINA DE POMI CODÒGNI. I pomi codògni i dovarà esser ben fati. De man in man che se li tàia a tòc, assàndoghe la scòrzha, méterli in te 'n cadìn pién de acqua col limone, senò i devénta subito neri. Quando che i sarà tuti taiàdi, desgiozholàrli e méterli in te 'na cassariòla granda; cuèrderli de acqua e cusinarli a fògo bas fin che no i se sarà desfadi. Alora, cuèrder la boca de 'na tarina co 'na tela finissima de lin; butarghe pasora i pomi còti e assàr che i se desgiozholée lori soli par almanco do ore. Dopo, pesar sto sugo de pomi, méterlo in te 'na técia co altretanto peso de zhuchero e assàr sul fògo par 'na bona mèda ora. Passà sto tempo, méter la gelatina dentro ‘n vasét de vièro.
HOME il frutto Codognč dove siamo foto
la mela cotogna è bella (e buona cotta!),   la sua festa si tiene ogni 2a domenica di ottobre...
LA COTOGNATA
me nona me conta...